तुळजाभवानी देवीची रथअलंकार महापूजा
नवरात्रीच्या चौथ्या माळेला हजारो भाविकांनी घेतले तुळजाभवानीचे दर्शन
तुळजापूर / सिद्दीक पटेल
शनिवार मिती अश्विन शु. ५ , ललिता पंचमी, शके १९४० शारदीय नवरात्रीच्या चौथ्या माळेदिवशी तुळजाभवानीची रथ अलंकार महापूजा बांधण्यात आली. हजारो भाविक भक्तांनी या रथ अलंकार महापूजेचे भक्तीभावाने दर्शन घेतले. आई राजा उदो उदोच्या गजराने मंदीर परिसर दुमदुमून जात होता.
शुक्रवारी पहाटे १ वा. देवीची चरणतीर्थ पूजा संपन्न होऊन मंदीर भाविकांसाठी खुले करण्यात आले. सकाळी ६ वा. नित्य अभिषेक पूजेची घाट देण्यात आली. त्यानंतर देवीस पंचामृत अभिषेक स्नान घालण्यात आले.सिंहासन पूजा संपन्न झाल्या.
यावेळी मंहत तुकोजीबुवा, भोपे पुजारी विरेंद्र कदम, अतुल मलबा, सचिन परमेश्वर, संजय सोंजी, संकेत पाटील, प्रशांत सोंजी, बाळकृष्ण कदम, शशिकांत परमेश्वर, वसंत कदम, सचिन पाटील, मंदीर कर्मचारी दिलीप नाईकवाडी आदींची उपस्थिती होती.
अभिषेक विधी संपल्यानंतर धुपारती करुन अंगारा काढण्यात आला.
तुळजाभवानी देवीला महावस्त्र नेसवून विविध अलंकारांनी मढवण्यात आले. ललिता पंचमीपासून नवमीपर्यंत रोज विशेष अलंकार महापूजा बांधण्यात येतात. शनिवारी ललिता पंचमीच्या निमित्ताने पारंपारिक रथ अलंकार महापूजा बांधण्यात आली. अलंकार महापूजेच्या निमित्ताने प्राचिन, पुरातन, दागदागिन्यांनी देवीला मढवण्यात येते.
शारदीय नवरात्राच्या चौथ्या माळेला देवीस फिकट केशरी पदराचा लाल रंगाचा शालू नेसविण्यात आला. जांभळ्या आणि सोनेरी जरीकाठीचा शालूमध्ये तुळजाभवानी देवीचे रुप प्रसन्न दिसत होते. मस्तकावर नाजूक कलाकुसर आणि माणिक, पाचू आदी रत्ने जडवलेला सुवर्णमुकूट देवीने धारण केला होता. मुकुटावर सुवर्ण छत्र असून मुकुटाच्या उजव्या बाजूस मोत्यांचा तुरा सोडण्यात आला होता. देवीला माणिक रत्नजडित सुवर्णनेत्र लावण्यात आले होते. भाळावर हळदी चंदनाचा लेप लावून बाजूस कुंकवाचा मळवट रेखला होता. हळदीचंदनाच्या लेपावर शुद्ध कुंकवाने ॐ कारासह त्रिशूल रेखाटला होता. देवीस रत्न मोती जडित सुवर्णनथ घालण्यात आली. यानंतर देवीस प्राचिन दागदागिन्यांनी मढवण्यात आले. यात शेकडो वर्षांपासून वापरले जाणारे पुरातन तसेच अत्यंत नाजूक कलाकुसर असलेले दागिने आहेत. शिवकालीन सुवर्ण पुतळ्यांच्या माळा, किमती पाचू आणि माणिक, मोती जडवलेले सोन्याचे पदक, सुवर्णमाळा, रत्नहार, मोतीमाळा आदी दागिन्यांनी सजवण्यात आले.
यानंतर देवीची ललिता पंचमी निमित्ताने विशेष अलंकार महापूजा मांडण्यात आली. यात देवीच्या सिंहासनास रथाचे रुप देण्यात आले. देवीने केस तिच्या उजव्या खांद्यावर मोकळे सोडले असून देवीच्या उजव्या हाती प्रतोद असून डाव्या हातामध्ये लगाम धरला आहे. सिंहासनाच्या दोन्ही बाजूस चक्र जोडले असून पुढे धवल रंगाचे पाच देखणे अश्व जोडले आहेत.
तुळजाभवानीचे रथ अलंकार महापूजेतील रूप अत्यंत विलोभनीय आणि मंगलमय दिसत होते. हजारो भाविकांनी आई राजा उदो उदोच्या उद्घोषात देवीच्या रथ अलंकार महापूजा रुपाचे भक्तीभावाने दर्शन घेतले.
तत्पूर्वी शुक्रवारी रात्री प्रक्षाळपूजा संपन्न होऊन वाघ वाहनावरून देवीचा छबिना काढण्यात आला. देवीची चांदीची उत्सवमूर्ती छबिन्याच्या व्याघ्रवाहनावर ठेऊन मुख्य मंदीराभोवती प्रदक्षिणा घालत छबीना मिरवणूक संपन्न झाली. यावेळी मंदीर संस्थान अध्यक्ष तथा जिल्हाधिकारी राधाकृष्ण गमे, महंत तुकोजीबुवा, देवीचे भोपे, पुजारी सेवेधारी, मंदीर व्यवस्थापक आणि कर्मचारी यांच्यासह भाविक मोठ्या संख्येने उपस्थित होते.
(उस्मानाबाद जिल्ह्यासह महाराष्ट्रात लोकप्रिय असलेले साप्ताहिक न्यूज सिक्सर ला बातम्या व जाहिरात देण्यासाठी संपर्क 8087544141,8432860606)
