राज्य बाल हक्क संरक्षण आयोगाच्या समस्यांबाबत सकारात्मक विचार करणार
महिला व बालविकास मंत्री पंकजा मुंडे
मुंबई/प्रतिनिधी
महिला व बालविकास मंत्री पंकजा मुंडे यांनी आज राज्य बाल हक्क संरक्षण आयोगाच्या विविध समस्या जाणून घेतल्या. त्या समस्या सोडविण्यासाठी सकारात्मक विचार करणार असल्याचे त्यांनी सांगितले.
विधान भवनातील त्यांच्या दालनात राज्य बाल हक्क संरक्षण आयोगाच्या विविध समस्यांबाबत दि 19 रोजी आयोजित बैठकीत त्या बोलत होत्या. यावेळी आयोगाचे अध्यक्ष प्रविण घुगे, महिला व बालविकास विभागाच्या सचिव विनिता वेद सिंगल, आयुक्त, ऋषिकेश यशोद, आयोगाचे सदस्य डॉ. शालिनी कराड, वासंती देशपांडे, स्वरदा केळकर आणि विजय जाधव यांची प्रमुख उपस्थिती होती.
मंत्री मुंडे म्हणाल्या की, गतिमंद मुलां-मुलींची बालगृहे सामाजिक न्याय व विशेष सहाय्य विभागाकडे हस्तांतरीत करण्यात आली आहेत. याबाबत सामाजिक न्याय व विशेष सहाय्य विभागाकडून आवश्यक ती कार्यवाही करण्यासाठी सामाजिक न्याय मंत्री राजकुमार बडोले आणि सचिवांबरोबर चर्चा करणार आहे. तसेच गतिमंद मुलां-मुलींसाठी शासनाकडून अधिक लाभ देण्यासाठी सचिव स्तरावर संबंधित सचिवांबरोबर चर्चा करण्यात येणार असल्याचे त्यांनी सांगितले.
राज्यातील बाल कल्याण समिती व बाल न्याय मंडळ सदस्यांचे थकीत मानधन देण्यात आले आहे. वाढीव मानधन देण्यासाठी केंद्र शासनाकडे प्रस्ताव सादर करण्यात येत आहे. राज्य शासनाकडूनही त्यांना मानधन वाढविण्यासाठी महिला बालविकास विभागाच्या सचिवांना अभ्यास करुन अहवाल सादर करण्याच्या सूचना दिल्या आहेत. या बैठकीत अर्थसंकल्पीय पूरक मागणी,<आयोगाची अतिरिक्त पदे मंजूर करणे, आयोगाच्या आस्थापनेवर अतिरिक्त पदे भरणे आदी विषयावर सकारात्मक चर्चा करण्यात आली.
(उस्मानाबाद जिल्ह्यासह महाराष्ट्रात लोकप्रिय असलेले साप्ताहिक न्यूज सिक्सर ला बातम्या व जाहिरात देण्यासाठी संपर्क 8087544141,8432860606)
कोणत्याही टिप्पण्या नाहीत:
टिप्पणी पोस्ट करा